Jînenîgarî

Mihemed Hacî Mehmûd Mihemed, nasnavê wî Hemeyê Hacî Mehmûd û Kake Heme ye, sala 1953an li bajarê Helebceyê ji dayik bûye, sala 1975an piştî şikestina şoreşa Îlonê koçberî Îranê bûye, di 18ê tebaxa 2004an de wek endamê Encûmena Niştimanî ya Demkî ya Îraqê (المجلس الوطني المؤقت العراقي) hatiye destnîşankirin, di 4ê hezîrana 2005an de bûye endamê Encûmena Niştimanî ya Kurdistanê (xula duyem) li ser lîsteya Partiya Sosyal Dêmokrata Kurdistanê, di 7ê gulana 2006an de bûye wezîrê herêmê (kabîneya pêncem), şareza yê zimanên kurdî, farisî û erebî ye.

Xebatname

Sala 1968an tevlî refên partiyê bûye û sala 1970yî şerefa endamtiyê jê re hatiye bexşîn, sala 1976an tevlî refên Komeleya (Marksî-Lenînî) bûye, di 26ê hezîrana 1976an de tevlî refên Hêzên Pêşmerge bûye, di meha mijdara sala 1976an de beşdarî şerê Banî Benok li Helebceyê bûye, sala 1977an fermandarê kertê bûye di Hêzên Pêşmerge yên Yekîtiya Niştimaniya Kurdistanê de, di 17ê nîsana 1978an de ji ber neguncaniya bîr û baweriyan dev ji refên Komeleya (Marksî-Lenînî) berdaye lê wek Pêşmerge di nav refên Yekîtiya Niştimaniya Kurdistanê de maye, di meha hezîrana 1980yî de berpirsê hêza Yekîtiya Niştimaniya Kurdistanê li devera Xoşnawetiyê bûye, di 16ê îlona 1980yî de fermandariya hêzên Yekîtiya Niştimaniya Kurdistanê di şerê Tepê Sefa yê Helebceyê de kiriye.

 Di 12ê kanûna pêşîn a 1980yî de tevlî refên Partiya Sosyalîst a Yekgirtû ya Kurdistanê bûye, di 3ê kanûna paşîn a 1981ê de li gundê Qewîle ya Helebceyê karîbûye Newşîrwan Mistefa sekreterê Komeleya Rencderan dîl bigire, sala 1981ê bûye endamê yedek ê Komîteya Navendî ya Partiya Sosyalîst a Kurdistanê di kongreya yekem de, 17ê nîsana 1981ê yek ji fermandarên şerê Alan û Hasil li Helebceyê bûye li dijî hêzên êrîşkar ên artêşa Îraqê, di meha tebaxa sala 1981ê de hatiye kirin endamê Komîteya Navendî ya Partiya Sosyalîst a Kurdistanê û berpirsê lîqa Silêmaniyê ya wê partiyê, di havîna sala 1982an de beşdarî azadkirina cadeya Helebce-Seyîd Sadiq bûye, di 2ê tebaxa 1983an de wek fermandariya hêzên Partiya Sosyalîst a Kurdistanê beşdarî şerê Şekralî-Xakoxolî yê Helebceyê li gel hêzên Yekîtiya Niştimaniya Kurdistanê bûye, sala 1986an wek fermandarê Şarezûrê yê Partiya Sosyalîst a Kurdistanê îmzeya rêkeftinnameya aştiyê li gel Yekîtiya Niştimaniya Kurdistanê kiriye, di meha nîsana 1986an de sedema aştiya di navbera Yekîtiya Niştimaniya Kurdistanê û Partiya Sosyalîst a Kurdistanê de bûye.

Di raperîna Başûrê Kurdistanê ya sala 1991ê de beşdarî azadkirina Şarezûr, Silêmanî, Xaneqîn û Kerkûkê bûye, di 19ê adarê de bi nûneratiya Partiya Sosyalîst a Kurdistanê beşdarî civîna Bereya Kurdistanî bûye bi mebesta diyarkirina dema hilbijartina Encûmena Niştimanî ya Kurdistanê û barûdoxa aborî û ewlehiya Başûrê Kurdistanê, di destpêka sala 1992an de beşdarî civîna Bereya Kurdistanî bûye bi mebesta damezrandina lijneya bilind a serperiştiya hilbijartina Encûmena Niştimanî ya Kurdistanê, di 7ê nîsana 1992an de bi nûneratiya Partiya Sosyalîst a Kurdistanê beşdarî civîna berfireh a Pîrmamê ya Bereya Kurdistanî bûye bi mebesta amadekariya ji bo proseya hilbijartina Encûmena Niştimanî ya Kurdistanê, sala 1992an palêorê lîsteya Yekgirtinê bûye ji bo proseya hilbijartina Encûmena Niştimanî ya Kurdistanê, sala 1992an endamê serokatiya Partiya Yekgirtina Kurdistanê bûye, roja pêncşemê 20ê tebaxa 1992an li bajarê Hewlêrê beşdarî yekemîn kongreya Partiya Yekgirtina Kurdistanê bûye, roja pêncşemê 27ê tebaxa 1992an ji aliyê nûnerên kongreya yekem a Partiya Yekgirtina Kurdistanê ve wek endamê Komîteya Navendî hatiye hilbijartin, sala 1992an endamê dezgeha leşkerî ya Partiya Yekgirtina Kurdistanê bûye.

Sala 1993an ji aliyê nûnerên kongreyê ve wek endamê mekteba siyasî ya Partiya Dêmokrata Kurdistanê - Yekgirtû Kongreya Yanzdehêm a Partiya Dêmokrata Kurdistanê hatiye hilbijartin lê demekê kurt di vî postî de maye û ji partiyê veqetiyaye, roja çarşemê 6ê çiriya pêşîn a 1993an li xala sînorî ya Başmaxê li sînorê parêzgeha Silêmaniyê wek endamê mekteba siyasî ya Partiya Dêmokrata Kurdistanê - Yekgirtû pêşwazî li karwanê serok Mistefa Barzanî (1903-1979) û Îdrîs Barzanî (1944-1987) kiriye ku ji Komara Îslamî ya Îranê ber bi dawîmenzilgeha wan li gundê Barzanê yê ser bi parêzgeha Hewlêrê ve diçûn, di 20ê nîsana 1983an de beşdarî şerê Kanî Berdineyê bûye, di 15ê çiriya paşîn a 1994an de kongreya damezrandina Partiya Sosyalîst a Dêmokrat a Kurdistanê li bajarê Hewlêrê saz kiriye, roja şemiyê 18ê adara 1995an li Pîrmamê ji aliyê serokê Partiya Dêmokrata Kurdistanê - Yekgirtû ve pêşwazî lê hatiye kirin.

 Di meha çiriya pêşîn a 1999an de beşdarî kongreya damezrandina Komeleya Pêşmergeyên Dêrîn ên Partiya Komunîst a Kurdistanê bûye, sala 2014an berpirsê mihwerê Kerkûkê bûye li dijî hêza DAIŞê, roja duşemê 21ê kanûna paşîn a 2019an ji aliyê serok Mesûd Barzanî ve pêşwazî lê hatiye kirin. 

Ji berhemên wî:

  1. Şoreş û Pêşmergayetî - Taqîkirina heft salên şoreşê 1976 - 1983 - 1991.

  2. Rûnkirdinewe le çend dêrêkda - 1993.

  3. Rojjmêrî Pêşmergeyek - behsa bûyerên (20) salên xebata şoreşa nû ya gelê me dike 1976 - 1996 - berga yekem - 1998.

  4. Rojjmêrî Pêşmergeyek - behsa bûyerên (20) salên xebata şoreşa nû ya gelê me dike 1976 - 1996 - berga duyem - bê sal.

  5. Rojjmêrî Pêşmergeyek - behsa bûyerên (20) salên xebata şoreşa nû ya gelê me dike 1976 - 1996 - berga sêyem - 2001.

  6. Rojjmêrî Pêşmergeyek 1976 - 1996 behsa (20) sal ji xebat û bûyerên şoreşa nû ya gelê me dike - berga çarem - 2001.

Çavkanî:

  1. Ehmed Banîxêlanî, Bîrewerîyekanim, (Stokholm - 1997z), r. 409 - 410, 532.

  2. Faiq Qadir Heme Salih, Kuanuy Xebat, (Taran - Çapxaneya Cengel - 2019z), r. r. 238 û 247, 249, 250.

  3. Silêman Mistefa Hesen, Kurd û yekem ezmûn, (Hewlêr - Çapxaneya Karo - 2017z), r. r. 28, 31, 33, 69, 75, 278.

  4. Erdşîr Peşneng, Kurdha der miyane cengê Îran û Îraq, (Tehran - Neşrê Merz û Bûm - 1394 H. Ş), s. s. 306, 329, 334.

  5. Bwar Nûredîn, Kurd û Kurdistan bîblîografya û pêristiyan le kitêbî kurdîda, bergî duwem beşî yekem, (Taran - Çapxaneya Taran - 2016z), r. r. 148, 183, 345, 464.

  6. El-Herb ela el-Îraq yewmiyat - wesayiq - teqarîr 1990 - 2005, (Beyrût - Merkezê Dîrasat el-Wehde el-Erebîye - 2007m), s. s. 524, 1159.

  7. Ehmed Şerîf Lek, Şirovey rûdawê mêjûyîyekan, bergî duwem, (Hewlêr - Çapxaneya Rojhelat - 2019z), r. 68.

  8. Xelef Xefûr, Defrî zêrrîn, bergî yekem, (Kerkoûk - Komeley Rûnakbîrî û Komelayetî Kerkoûk - Çapxaneya Karo - 2011z), r. r. 251 - 252, 255 256, 260 - 261, 263 - 265. 

  9. Rêkar Ehmed, Yekgirtin û hellweşanewe, (Hewlêr - Çapxaneya Behest - 2016z), r. r. 63, 78, 80.

  10. Serhed Yûnis Mihemed, Le Şarezûrewe bo Nasirîye, (Hewlêr - Çapxaneya Hêvî - 2018z), r. r. 155 - 156, 161, 184.

  11. Selam Ebdulkerîm, Jiyanî siyasîy le başûrî Kurdistan 1975 - 1991, (Silêmanî - Çap û billawkirdinewey Çwarçira - 2011z), r. 112. 

  12. Şaxewan Şorriş, Qadir Şorriş çil sall xebat û têkoşan, (Danîmark - Çapxaneya Xoyîbûn - 2001z), r. 150. 

  13. Aîde el-Elî Serî el-Dîn, el-Ekrad fî el-Alem tarîxuhum û musteqbeluhum, el-Cuz' el-sanî, (Beyrût - el-Dar el-Erebîye lil-Ulûm naşirûn - 2018m), s. 196.

  14. Fazil Re'ûf, Berew xor, bergî yekem, (Hewlêr - Çapxaneya Wezareta Roşenbîrî - 2001z), r. 186.

  15. Fazil Kerîm Ehmed, Be xewnî gewrewe kewtîne rê, bergî yekem, (Silêmanî - Çapxaneya Taran - 2019z), r. r. 151, 339.

  16. Fo'ad Sidîq, Gerdelûlî siyasîyet, (Hewlêr - Wezareta Roşenbîrî - Berrêweberayetîy giştîy çap û billawkirdinewe - Çapxaneya Roşenbîrî - 2006z), r. r. 118 - 119.

  17. Mihemed Mela Qadir, Xebatname kurte mêjûyî Partî û kultûrî Barzanîy nemir, çapî duwem, (Hewlêr - Dezgay çap û billawkirdinewey Aras - 2007z), r. r. 96 - 97. 

  18. Newşîrwan Mistefa Emîn, Le kenarî Danûbewe bo xirrî Nawzeng, (Bê şwên - 1997z), r. 191.

  19. Mihemed Hacî Mehmûd, Roj jmêrî Pêşmergeyek 1976 - 1996, bergî çwarem, (Silêmanî - Çapxaneya Dîlan - 2009z), r. r. 1126.