ناکۆکیی ساسانی-بیزەنتییەکان و کاریگەرییەکانی لەسەر کوردستانی کۆن لە نێوان ساڵانی (٥٩٠-٦٣٠ ز)دا

ئەم کتێبە لێکۆڵینەوەیەکی مێژووییە لەسەر ناکۆکیی ساسانی-بیزەنتی و کاریگەرییەکانی لەسەر کوردستانی کۆن لە نێوان ساڵانی (٥٩٠-٦٣٠ ز)دا، بابەتەکانی لە بەش و بڕگەکاندا ڕیزکراون کە لە پێشەکییەک، پێڕستێک، سێ بەش و پاشکۆکان پێک دێت. لە سەرەتای ئەم کتێبەدا کورتەیەکی مێژوویی ئیمپراتۆرییەتی ساسانی و بیزەنتی هەیە.

لە بەشی یەکەمی کتێبەکەدا باسی پاشخانی جوگرافی و مێژوویی کوردستانی کۆن و ناکۆکییەکانی نێوان ساسانییەکان و بیزەنتییەکان لە ساڵی ٢٢٤ی زایینییەوە تا ساڵی ٥٩٠ کراوە و دوو بەش لەخۆ دەگرێت، لەسەر کورد و ناوی کوردستان، هەرێم و شارە هەرە گرنگەکانی کوردستانی کۆن وەک هەرێمی میدیا، ئازەربایجان (میدیای ئەترۆپاتین)، میزۆپۆتامیا (جزیرە)، حەدیاب و کوردۆک، هەرێمەکانی دیکە کە کورد تێیدا دەژین وەک ئەرمەنستان، فارس و ئەهواز (خووزستان)، دانیشتووانی دیکەی کوردستانی کۆن وەک فارس، عەرەب، ئەرمەنی و ڕۆم، پێکهاتە ئاینییەکانی وەک زەردەشتی و کریستیان. هۆکارەکانی ململانێکان و گرنگیی کوردستان لە شەڕی ساسانی-بیزەنتییەکاندا.

لە بەشی دووەمدا باسی پەیوەندییە سیاسییەکان و ناکۆکییە سەربازییەکانی نێوان ساڵانی ٥٩٠-٦٢١ی زایینی کراوە و لە دوو بەش پێک دێت، لەسەر سەردەمی پەیوەندییە سیاسییەکانی نێوان ساڵانی (٥٩٠ – ٦٠٢، ز) وەک بزووتنەوەی بەهرام چۆبین و پەنابەریی خوسرەو پەروێز بۆ لای قەیسەری بیزەنتی مۆریس، کەمپەینی بیزەنتییەکان-ساسانییەکان بۆ گەڕاندنەوەی خوسرەو پەروێز بۆ سەر تەختی دەسەڵات، سەردەمی پەیوەندییە سیاسییەکانی نێوان ساڵانی ٥٩١-٦٠٢ و کێشە ناوخۆییەکانی بیزەنتی و نیشانەکانی سەرهەڵدانەوەی ناکۆکیی ساسانی-بیزەنتییەکان. سەرهەڵدانەوەی شەڕی سەربازی لە نێوان ٦٠٣-٦٢١ی ز، وەک ململانێی فۆقاس-پەروێز (٦٠٢-٦١٠ ز)، لە نێو ئەمانەدا کەمپەینەکانی ساسانییەکان (٦٠٣-٦١٠ ز)، کەمپەینی دژی میزۆپۆتامیا و کەمپەینی دژی ئەرمەنستانیش جێی دەگرێت، ململانێکانی سەردەمی هێراکلیۆس-پەروێز (٦١٠-٦٢٨ ز)، لە نێویاندا شۆڕشی هێراکلی و قەیسەر هێراکلیۆس و ململانێکانی (٦١٠-٦٢٢ ز) هەن، هۆکارەکانی تێکچوونی ئیمپراتۆرییەتی بیزەنتی تا ساڵی ٦٢٢.

لە بەشی سێیەمی ئەم کتێبەدا باسی قۆناغی کۆتایی شەڕی ساسانی-بیزەنتی و کاریگەرییەکانی لەسەر کوردستانی کۆن دەکات و لە دوو بەش پێک دێت، لەسەر قۆناغی کۆتایی ململانێی نێوان ٦٢٢-٦٣٠ی ز، وەک ئامادەکاری و ڕێکخستنەکانی هێراکلیۆس بۆ ڕووبەڕووبوونەوەی پەروێز، کەمپەینەکانی هێراکلیۆس لە نێوان ساڵانی ٦٢٢ - ٦٢٥ی ز، چارەسەری کێشەی ساسانی-بیزەنتییەکان لە کوردستان، هێراکلیۆس و تێکۆشان بۆ تەختی دەسەڵاتی ساسانییەکان. کاریگەرییەکانی ناکۆکیی ساسانی-بیزەنتییەکان لەسەر کوردستانی کۆن وەک کاریگەرییە سیاسی، ئاینی و ئابوورییەکان.